عەتا كەریم
یەكێتیی نیشتیمانیی كوردستان، دوو قۆناغی لە چوار هەنگاوی بۆ كۆنگرەی چوارەم بڕیوە، كە كۆنفرانسی كۆمیتە و مەكتەبەكانی تەواو كردووە و ماوەتەوە سەر كۆنفرانسی مەڵبەندەكان و دوای ئەوەیش ئەم حزبە دەخاتە بەردەم هۆڵی بەستنی كۆنگرەیەك كە دەبوایە 7 ساڵ پێش ئێستا گرێی بدایە، كە بە پێی پەیڕەوەكەی سێ ساڵ جارێك كۆنگرە دەكات كە لە كۆنگرەی سێهەمیدا لە 2010ـەوە بڕیاری لێ دراوە.
بۆ كۆنگرە، یەكێتیی پەیوەست كراوە كە نابێت لە 1000 ئەندامی كۆنگرە زیاتر بێت، بەڵام لەم ژمارەیە پێویستی بەوەیە كە كوالێتی و چۆنایەتی و هاوسەنگییش لەبەر چاو بگیرێت، ئەوەش لە قۆناغی یەكەمی پڕۆسەكەوە دەست پێ دەكات، كە سەرخستنی كادرە لە توێژ و چین و پسپۆڕییە جیاوازەكان، بەو پێیەی وێنەی گشتی فرەیی پێویست لە ناو هەزار كەسی كۆنگرە بكێشێت، كە دوای ئەویش لە كۆمیتەی سەركردایەتیدا وەك ناوەندی بیركردنەوەی سەرەوەی هەره‌می هێزی سیاسیی دەیخوازێت.
هەموو هێزێكی سیاسی، بە یەكێتیی و هەموو ئەوە هێزە سیاسییانەی دیكە كە لە بەردەم كۆنگرەی دواخراودان، پێویستیان بەوەیە لە ڕووی فرەپێكهاتەیی پسپۆڕییەوە دەوڵەمەند و هاوسەنگ بێت، چونكە هێزەكان بەربژێری كابینەكانی حكومەتیش لەم ژوورە سیاسییانەوە دەبەنە ناو حكومەت، كە تا ئەم كابینە نوێیەی بەرەنجامی هەڵبژاردنی 2018یش بەم جۆرە بووە.
مادام حكومەتیش ناتوانێت كاره‌كتەرە وەزارییەكانی كە زۆرینەیان لەم شێوازە دوور بخاتەوە، كەواتە ئەركی هێزە سیاسییەكان دەكات بە پێشمەرج تا پشت بە فرەیی و چۆنایەتیی پیشەیی ببەستێت.
لەم ڕوانگەیەوە هەموو هێزێكی سیاسی پێویستییەكی سەرەكیی هەیە بە توانای پیشەیی یاسایی، سیاسی، ڕۆژنامەنووسی و ڕۆشنبیری و .. هتد، تا لە پێكهاتەی سەرەكیی سەری حزبدا وەك كۆمیتەی سەركردایەتی بوونیان هەبێت، كە هێزی بیركردنەوەی سیاسی و بڕیاری سیاسی وەك نموونەی نوێبوونەوە وادەی دیاریكراو وەك تەمەنی حزب «دەبزوێنێت»، كە ئەم بزواندنەش لە ناو پێكهاتەی ئەندامانی كۆنگرە لە دایك دەبێت، كە گەیشتووه‌تە هۆڵی دڵی بڕیاردان و درووستكردنەوەی بیركردنەوەی سیاسی و هێزی سیاسی، كە یەكێتیی نیوەی ئەم قۆناغەی بڕیوە.
یەكێتیی، بە كۆنفرانسی فراوان كار بۆ كۆنگرە دەكات، بەڵام ئەم شێوازە دەخوازێت بە هاوسەنگی و دیراسەی وردی پێشوەخت كاری نەخشەكێشانی پێكهاتەی سیاسی درووست بكات، بەڵام ئەگەر لەم هەنگاوەدا وەك پێویست سەركەوتوو نەبوو، ئەوا ئۆپشنی تەزكییەی 120 ئەندامی پەیڕەو كردووە، ئەویش دیسانەوە دوای بەردەستبوونی ژمارە و چەندایەتی لە كوالێتیی ئەندامانی كۆنگرەكەی بڕیاری دابەشكردنی بدرێت، ئەو بۆشاییە پڕ دەكەتەوە، نەك پێشوەختەی نادیار دابەش كرابن لەسەر بنەمای دیكە.
هەموو هێزێكی سیاسی، دەموچاو و دەسەڵات و فۆڕمی كار و بیركردنەوەی لە كەرەستەی بیركردنەوەی هەناوە سیاسییەكەیەوە دەردەچێت، كە لە هەنگاوەكانی یەكەمەوە بۆ كۆنگرە دەردەچن، بۆیە زۆرینەی پیشەیی زاڵبووی بیركردنەوە سیاسییەكە دەبێت، كە دواجار جووڵە سیاسی و دیبلۆماسی و سەربازییەكانی بۆ بەڕێكردنی تەمەنی شەرعییەتپێدراو تەواو دەكات، بەرپرس دەبێت لە شكست و دەستكەوتی ماوەكەی.
جیا لەو بیركردنەوە سیاسییەی كە بە كۆنگرە لە دایك دەبێت، مەرجە كاریگەریی هەبێت لە ستراكچەری بڕیار و ئیدارەدانی یەكێتیی وەك هێزێكی سیاسیی بەردەم كۆنگرەكەی، كە ئەمڕۆی ژینگەی سیاسی دەیسەپێنێت، كە مەرجە لەگەڵ ساڵی تەمەنەكانی پلانی سیاسی و ئیداریی بۆ دابنێت، نەك پلان و پەیڕەوێكی تەمەن سێ ساڵ، بۆ نۆساڵ بەڕێكردن بە كار بهێنرێت، كە ئەمە خاڵی لاواز و چەقینی یەكێتیی بووە، كە زیانی دەرفەتدانی بۆ دوو خوول لە كادرەكانی داوە و نۆ ساڵیش لە دەرفەتی نوێبوونەوە دووری خستووه‌تەوە، كە بەشێكی بە ڕێككەوتن و بیرجیاییەكانی هەڵكشاو بۆ ئاستی ڕەتكردنەوە و دووركەوتنەوە لە لێكەوتە خراپەكانی دواخستنی كۆنگرەوە هەڵتۆقین.
یەكێتیی بەم كۆنگرەیە، بەر لە هەموو شتێك پێویستی بە پەڕینەوەیە لە ناكۆكییەوە بۆ یەكڕیزی، لە پەرتیی بیركردنەوەوە بۆ یەك بیركردنەوە، لە نوێكردنەوەوە بۆ نوێبوونەوە، لە سەروشیەوە هێزی نویبوونەوەكە لە ئێستای قۆناغ و كەرەستەی توانای مرۆیی و لێهاتووییەوە سەرچاوە بگرێت، سەرباریش، هێزی سیاسیی بەهێز، پێویستی زیاتری بەوەیە كە ڕەگەزە سەرەكییەكانی كێبڕكێی هێزەكان لە گۆڕەپانی سیاسیدا بۆ بردنەوە مسۆگەر بكات و لە ناو ئەو پێكهاتەیەدا كارەكتەر و فیگەرەكانی بنەخشێنێت.
