گیاهی ترین AnzanDigital فروشگاه

ئاژانس بۆچی؟

“ئاژانس” ده‌یه‌وێت هه‌فته‌نامه‌یه‌كی سیاسی گشتی كوردستانی بێت. ئه‌م بڵاوكراوه‌یه‌ كار بۆ ڕه‌خساندنی ده‌رفه‌ت بۆ له‌یه‌كتری تێگه‌یشتنی بیروڕا جیاوازه‌كان ده‌كات، به‌ڵام ناسنامه‌ی خۆی له‌سه‌ر پێكدادانی ئایدیۆلۆژیا جیاوازه‌كان بنیاد نانێت.

له‌ ژینگه‌ی سیاسی و كۆمه‌ڵایه‌تیی كوردستاندا، خراپده‌ربڕین پێگه‌ی به‌ ئازادیی ڕاده‌بڕین له‌ق كردووه‌. هاوحزبی، جێگه‌ی هاونیشتمانیبوونی گرتووەته‌وه‌ و سه‌رقاڵبوون به‌ به‌كارهێنانی هه‌واڵ و زانیاری، بۆ چه‌واشه‌كردن له‌ بری هۆشیاركردنه‌وه‌، ڕۆ چووەته‌ ناو تانوپۆی میدیا و ڕاگه‌یاندنه‌ جیاوازه‌كانەوە.

ئێمه‌ له‌ “ئاژانس”، سه‌رمایه‌ی مادی، بۆ پاڵپشتیی مه‌عنه‌وی به‌كار ناهێنن. میدیا ناكه‌ین به‌ پاشكۆی هه‌ڵه‌ی سیاسی و پێداگری ناكه‌ین به‌وه‌ی له‌سه‌ر هه‌ڵگێڕانه‌وه‌ی حه‌قیقه‌ت، درێژه‌ به‌ به‌ڕێوه‌بردنی قه‌یران و ئاڵنگارییه‌كان بده‌ین.

“نه‌وشیروان موسته‌فا”، وه‌كو سیاسه‌تمه‌دار و مێژووناسێكی كوردستانی، چه‌مكی ئاڵنگاریی خسته‌ ناو ئه‌ده‌بیاتی سیاسیی كوردییه‌وه‌. له‌ ڕۆژی ڕێككه‌وتنی نێوان “بزووتنه‌وه‌ی گۆڕان” و “یه‌كێتیی نیشتمانیی كوردستان”ـدا، ته‌حه‌دی، چاڵێنج یان ئاڵنگاری بوو به‌ به‌شێكی ئه‌كتیڤ له‌ پرۆسه‌ی بیركردنه‌وه‌ی كوردستانیدا. ئێستا ئاڵنگاری به ‌ته‌نها له‌ دووری و نزیكیی گۆڕان و یه‌كێتی له‌ یه‌كتری و په‌یوه‌ندییه‌كانیان له‌گه‌ڵ پارتی دیموكراتی كوردستاندا، كورت نابێته‌وه‌. له‌وێشدا كۆتایی نایه‌ت كه‌ هێزه‌ ئیسلامییه‌كانی كوردستان له‌ نێوان نه‌ته‌وه‌ییبوون و ئیسلامیبووندا چۆن له‌نگه‌ر ده‌گرن. گه‌شه‌ و پاشه‌كشێی سه‌له‌فیزم له‌ كوردستاندا و هه‌ڵگه‌ڕان به‌ ته‌پۆلكه‌ی ته‌كفیر و ململانێی نێوان عه‌لمانییه‌ت و توندڕه‌وی، كۆتایی ئاڵنگارییه‌كان نییە.

پاشه‌كشێی كارایی سیستمی حوكمڕانی و خزمه‌تگوزاری و نابه‌رپرسیارێتی له‌به‌رده‌م یاسا و ڕێسا و گه‌لدا، قه‌یرانی شه‌رعییه‌ت و مه‌شرووعییه‌ت، جیاوازیی ئاستی بژێویی بنكه‌ و لوتكه‌ و به‌رده‌وامیی هه‌ڕه‌شه‌ی جینۆساید و تیرۆریزم له‌سه‌ر خاك و خه‌ڵكی كوردستان، شانبه‌شانی نه‌بوونی به‌رنامه‌یه‌كی گشتگیری سیاسی، ئابووری و كۆمه‌ڵایه‌تی بۆ ڕێكردنی ئه‌م جڤاته‌ له‌گه‌ڵ گۆڕانكارییه‌ خێرا و مه‌ترسیداره‌ ناوچه‌ییه‌كاندا، سه‌ختیی دۆخه‌كه‌ و به‌رزیی ئاستی ته‌حەدییه‌كانمان نیشان ده‌دات، كه‌ پێویستی به‌ یه‌كگرتوویی و نه‌رمی و توانای هه‌ڵمژین و كاردانه‌وه‌ی خێرا و پڕبه‌پێست و واقعی هه‌یه‌.

لێره‌وه‌، “ئاژانس” یاری له‌گه‌ڵ خه‌یاڵ ناكات و شعووری نه‌ته‌وه‌یی ختووكه‌ نادات، به‌ڵكو ئه‌وه‌ی ده‌یكات هه‌وڵدانه‌ بۆ بوون به‌ ناوه‌ندی گفتوگۆی جددی و ڕاسته‌قینه‌ی نێوان بیروباوه‌ڕ و به‌رژه‌وه‌ندییه‌ جیاوازه‌ حزبی و ناوچه‌ییه‌كان. به‌غدا و ئه‌نقه‌ره‌ و تاران و دیمه‌شق چۆن له‌ كوردستان ده‌ڕوانن و هه‌ولێر و سلێمانی چۆن به‌ره‌و پیری ڕووداوه‌كان بچن، ده‌بێته‌ به‌شێك له‌ كاری ئه‌م هه‌فته‌نامه‌یه‌ و له‌ كاتێكدا ڕا و پلانی نوخبه‌ی سیاسیی ده‌ره‌وه‌ش له‌سه‌ر ئه‌م ئاڵنگارییانه‌ بۆ خوێنه‌ری كوردستانی ده‌گوازێته‌وه‌، ده‌رفه‌تی یه‌كسان له‌به‌رده‌م ڕا و سه‌رنجه‌ ناوخۆییه‌ جیاوازه‌كاندا ده‌ڕه‌خسێنێت. به‌مه‌ش بڵاوكراوه‌كه‌تان ده‌بێته‌ ئامرازێك بۆ كوردستانێكی گه‌شتر و گه‌لێكی هۆشیارتر.

له‌ هیوای ئێمه‌دا، “ئاژانس”، زیاتره‌ له‌ بڵاوكراوه‌یه‌ك.

بەهێزکراوی تۆڕی میدیایی ئاژانس 2016, مافەکانی پارێزراوە azhans.krd

Powered by keepvid themefull earn money